Sa mundo ng makabagong panahon tila kakambal na ng buhay ang mabilis na pagbabago dahil sa teknolohiya. Nariyan ang mga liham na hindi na kailangan ng kartero. Balitang hindi na kailangan ng telebisyon, dyaryo at radyo. Ganoon din ang mga usaping pinansyal na hindi mo kailangan magbilang at maghintay pa ng sukli mo dahil lahat ng ito ay elektroniko. Sa isang klik!, mabilis na nasusulusyonan ang iba’t ibang aspeto. Sa ibang sabi, napapabilis nito lahat ng komunikasyon at transaksyon sa mundo.
Lahat na yata ng bagay sa mundo konektado na sa internet. Kahit ang pangungutang nasa ibang lebel na rin dahil sa mga naglipanang pautangan sa mga aplikasyon sa telepono. Ang siste? Nadadagdagan lang lalo ang problema ng isang tao sa panghihiram dito. Ang dahilan? -ang hindi makatarungan tubo at iksi ng panahon ng pagbabayad. Pero ano nga ba ang sanhi bakit napipilitang kumapit sa sinasabing ‘patalim’ ang isang tao?
Una, Kahihiyan – ‘yan ang unang teorya kung bakit imblis na humingi ng paglingap sa mga kakilala nito ay nauuwi ito sa pagtangkilik dito. Pangalawa, Ang Panahon at Oras – hindi mo na kailangan magmakaawa o magpaawa. Hindi mo na kailangan ipaliwanag kung ano, para saan o kanino mo gagamitin ang hinihiram mo. Ganoon pa man ang utang ay mananatling utang hangga’t hindi mo ito nababayaran. Marahil ilan lang itong tagpo sa buhay na minsan yung mga inaakala nating magliligtas sa atin ay sila pa pala ang magpapabaon sa atin sa hukay.
Paano ba natin maiiwasan ang mga ganitong tagpo sa buhay natin? Anila, ang una daw makakaunawa sa atin ay ang ating mga kaibigan at pamilya. Normal ang mahiya dahil tao ka. Ang hindi normal ay sa pagkakataong nasasakal ka na, pero pilit mo pa ring pinapalabas na nakakaramdam ka pa rin ng ginhawa. Hindi kabawasan sa pagkatao mo kung minsan isinasalaysay din natin ang iba’t ibang kulay ng nararamdaman natin kahit luntian man ito.
Kasabay ng mabilis na ng pagtakbo ng teknolohiya, napapabilis nito ang mga bagay-bagay ganun din ang mga negatibo at panloloko. Kinakailangan lang natin gamitin ang mga bagay-bagay ng may utak at wasto.
Kung ang teknolohiya ang nagiging daan sa iba’t ibang uri ng sabwatan at panloloko, tandaan na ang teknolohiya din ang susi para makawala ang lahat ng uri karahasang elektroniko.
Ang simpleng pagbibigay ng bakas o komento sa mga nababasa natin sa mundo kompyuter ay malaking kontribusyon mo na upang maliwanagan at makapag-isip ang bawat mambabasa nito. Sa tulong na mga puna, sisibol ang mga pagtatanong na makakabuo ng desisyon kung dapat ba nilang subukan ang mga bagay na nag-aalangan sila.
Patunay na hindi lahat ng paglingap ay kinakailangan ng materyal o bagay para masabi itong isang pagtulong. Kaya sakaling mapa tipa ka sa cellphone at kompyuter tungkol sa isang usapin bilang isang pagpuna, isa itong malaking bagay o kontribusyon. Mapapaisip, mapapalawak at mapagkukuhaan ito ng iba’t ibang impormasyon o pananaw ng maraming mambabasa na tinatawag nating ngayong ‘Netizens’.
+ ———————- +
Ang Sanaysay na ito ay lahok sa 2024 Saranggola Blog Award
Salamat sa mga sponsors: